Усевалад Сьцебурака
| Усевалад Сьцебурака лац. Usievaład Ścieburaka | |
| Асабістыя зьвесткі | |
|---|---|
| Нарадзіўся | 17 ліпеня 1981 (42 гады) Жлобін, Гомельская вобласьць, БССР |
| Літаратурная дзейнасьць | |
| Род дзейнасьці | гісторык, прафэсар, пісьменьнік, паэт, празаік, |
| Мова | беларуская мова |
| Прэміі | «Залаты апостраф», «Прэмія імя Міхася Стральцова» |
| Узнагароды | |
| Творы на сайце Kamunikat.org | |
Усе́валад Мікала́евіч Сьцебура́ка (нар. 17 ліпеня 1981, Жлобін) — беларускі паэт, шоўмэн, тэлевядоўца. Ляўрэат прэміі «Залаты апостраф» (2004).
Жыцьцяпіс[рэдагаваць | рэдагаваць крыніцу]
Нарадзіўся ў сям’і дактароў Мікалая і Інэсы Сьцебуракаў. Малодшы брат — Анатоль Сьцебурака — беларускі гісторык, дацэнт БДУ. У дзяцінстве жыў у Жлобіне і вёсцы Амговічы Слуцкага раёну Менскай вобласьці. У 1990 годзе сям’я пераехала ў Вялейку, дзе атрымаў сярэднюю адукацыю ў гарадзкой гімназіі. Скончыў гістарычны факультэт БДПУ імя М. Танка ў 2003 годзе, асьпірантуру па спэцыяльнасьці «Гісторыя Беларусі» БДТУ ў 2006 годзе. З 1998 году жыве ў Менску.
Праца[рэдагаваць | рэдагаваць крыніцу]
Працаваў на пасадзе навуковага супрацоўніка ў Дзяржаўным музэі тэатральнай і музычнай культуры Рэспублікі Беларусь. У 2003—2010 гадах выкладаў гістарычныя дысцыпліны ў БДТУ і БДПУ. З 2012 году працуе ў ГА «Саюз беларускіх пісьменьнікаў» (ГА СБП). У 2012—2017 гг. на пасадзе памочніка старшыні, з сакавіка 2017 году — намесьнік старшыні ГА СБП [1].
З 2015 супрацоўнічае з тэлеканалам «Белсат» у якасьці вядучага праграмы «Размова» (2015—2019 гг.). З 2018 г. як вядучы і сцэнарыст працуе ў сатырычным праекце тэлеканала «Белсат» — «Хай так ТВ», што стаў пілётнай айчыннай вэрсіяй папулярнага фармату Late night show. У працы над першым у гісторыі беларускага тэлебачаньня вечаровым шоў таксама бяруць удзел многія вядомыя дзеячы культуры (кліпмэйкер Мацей Сабураў, бард Яўген Барышнікаў, актор Дзьмітры Есяневіч, Віталь Рыжкоў і інш.)
Як шоўмэн вядзе розныя культурныя мерапрыемствы, сярод якіх беларускія літаратурныя прэміі: «Дэбют» імя Максіма Багдановіча, «Лепшая паэтычная кніга года» імя Натальлі Арсеньневай, «Вершы на асфальце» імя Міхася Стральцова, прэзэнтацыі культурніцкай кампаніі Будзьма беларусамі і іншае[2]. Разам з народнай артысткай Рэспублікі Беларусь Зінаідай Бандарэнка вёў урачыстую частку вялікага сьвяточнага канцэрту «БНР-100» у Менску, 25 сакавіка 2018 году[3]. Неаднаразова працаваў вядоўцам на сьвяткаваньнх дзён нацыянальных культур Швэцыі і Польшчы ў Менску.
З 2017 году ўваходзіць у Раду ГА СБП і Вялікую Раду Згуртаваньня беларусаў сьвету «Бацькаўшчына»
Творчасьць[рэдагаваць | рэдагаваць крыніцу]
Пачаў друкавацца ў 1999 годзе на старонках «Нашай Нівы». Яго паэзія і проза зьяўлялася ў газэтах і альманахах: «Рэгіянальнай газэце», «Родзічах», «ЛіМ», «Літаратурная Беларусь», часопісах «Куфэрак Віленшчыны», «Дзеяслоў», ARCHE, у перакладзе на польскую мову ў часопісе «Pobocza», проза перакладалася таксама на ўкраінскую мову[4].
Ляўрэат прэміі «Залаты апостраф» часопісу «Дзеяслоў» у намінацыі «Лепшы дэбют» 2004 году. Прызэр Астравецкага паэтычнага слэму ў 2012 годзе[5]. Ляўрэат прэміі «Залаты апостраф» часопісу «Дзеяслоў» у намінацыі «Паэзія» 2022 году. Ляўрэат «Прэміі імя Міхася Стральцова» 2023 году[6]. Удзельнік шматлікіх літаратурных фэстаў: «Бязьмежжа» (Польшча), паэтычнага фэсту памяці імя Міхася Стральцова, памяці Анатоля Сыса, памяці Ніны Мацяш «Бабіна лета» (Беларусь) і інш. Браў удзел у папулярных паэтычных праектах: «Начная чытанка», «Галасы паэтаў», «Чорна-белыя вершы»[7]
Першая кніга вершаў і малой прозы «Крушня»[8] выйшла ў бібліятэчцы часопіса «Дзеяслоў», другая — «Бег па самаадчуваньні»[9] ў выдавецкай сэрыі «Кнігарня пісьменьніка». Трэцяя кніга вершаў «Сны дарог» (Менск, 2017 г.).
Шэраг вершаў паэта сталі песьнямі беларускіх музыкаў — менскага гурту «S°unduk» (Сундук)[10], магілёўскага гурта «Zatoczka»[11].
Сябра ГА «Саюз беларускіх пісьменьнікаў» з 2010 году.
Бібліяграфія[рэдагаваць | рэдагаваць крыніцу]
- Усевалад Сцебурака. Крушня. Вершы, проза. — Менск: Віктар Хурсік, 2006. — 120 с. — (Бібліятэка часопісу «Дзеяслоў» — Выпуск 3.). — 300 ас. — ISBN 985-6576-79-2
- Усевалад Сцебурака. Бег па самаадчуванні. Вершы, зацемкі. — Менск: Галіяфы, 2013. — 100 с. — (Бібліятэка Саюза беларускіх пісьменнікаў «Кнігарня пісьменніка» — Выпуск 39). — 300 ас. — ISBN 978-985-7021-07-9
- Усевалад Сьцебурака. «Сны дарог». Вершы. — Менск: Кнігазбор, 2017. — 64 с. — 500 ас. — ISBN 978-985-7136-87-2
- Усевалад Сьцебурака. Сцебуракаў лёс. — Менск: Кнігазбор, 2022. — 300 с. — 250 ас. — ISBN 978-985-883-046-5
- Усевалад Сцебурака. Беларускія зоркі: вершы, пераклады, проза, эсэ. — Менск: Цымбераў Р. М., 2024. — 220 с. — ISBN 078-985-7303-70-0
Крыніцы[рэдагаваць | рэдагаваць крыніцу]
- ^ Структура ГА "СБП"
- ^ Таццяна Гусева. 5 парадаў вясельнага маршалка // Салідарнасць
- ^ Стала вядома, хто будзе вядучымі на Дзень Волі(недаступная спасылка) // Наша Ніва
- ^ Як риба об лід. Антологія учасного білоруського оповідання. Київ, 2015.
- ^ Астравецкі паэтычны слэм
- ^ Адкрыццё фестывалю «Вершы на асфальце» і Прэмія імя М. Стральцова Беларуская Інтэрнэт-Бібліятэка: Kamunikat. Суполка беларускіх пісьменнікаў. — 2024-02-16 21:05.
- ^ Чорна-белыя вершы. Усевалад Сцебурака
- ^ Крушня на kamunikat.org
- ^ Абранец лёсу, або «Бег па самаадчуванні» Усевалада Сцебуракі
- ^ Сёння ня мой дзень
- ^ ZATOCZKA «Kachańnie»
Літаратура[рэдагаваць | рэдагаваць крыніцу]
- Arnold McMillin Spring Shoots: Young Belarusian Poets in the Early Twenty-First Century. — Cambridge, 2015.
Вонкавыя спасылкі[рэдагаваць | рэдагаваць крыніцу]
- Усевалад Сьцебурака. Самая вялікая праблема дарослых, што яны мусяць жыць хутка // Generation.by
- Усевалад Сцебурака. Пра беларускую літаратуру на Kamunikat.org Беларуская Інтэрнэт-Бібліятэка Kamunikat Камунікат — 25 ліпеня 2020.
- Сцебурака, Усевалад; Сцебурака, Анатоль Сцебуракаў лёс: mp3 Фонд Kamunikat.org — Выдавецкая сэрыя: Кнігі бяз літар.