Касьцёл Сьвятых Сымона і Тадэвуша (Лаздуны)

Помнік сакральнай архітэктуры
Касьцёл Сьвятых Сымона і Тадэвуша
Касьцёл Сьвятых Сымона і Тадэвуша Касьцёл Сьвятых Сымона і Тадэвуша
Краіна	Беларусь
Вёска	Лаздуны 1
Каардынаты	53°57′57.6″ пн. ш. 25°58′43.90″ у. д.
Канфэсія	каталіцтва
Эпархія	Гарадзенская дыяцэзія
Касьцёл Сьвятых Сымона і Тадэвуша на мапе Беларусі Касьцёл Сьвятых Сымона і Тадэвуша
Касьцёл Сьвятых Сымона і Тадэвуша на Вікісховішчы

Касьцёл Сьвятых Сымона і Тадэвуша — помнік архітэктуры пачатку XX ст. у Лаздунах. Знаходзіцца ў цэнтры колішняга мястэчка. Дзейнічае. Твор архітэктуры нэараманскага стылю.

Гісторыя

Вялікае Княства Літоўскае

Першы драўляны касьцёл у Лаздунах як філіяльны Суботніцкай парафіі фундаваў у 1576 годзе князь Альбрэхт Станіслаў Радзівіл. У 1770—1775 гадох на сродкі віленскага біскупа Тамаша Зяньковіча збудавалі новы драўляны касьцёл. Пры касьцёле дзейнічала школа.

Пад уладай Расейскай імпэрыі

Па трэцім падзеле Рэчы Паспалітай (1795 год), калі Лаздуны апынуліся ў складзе Расейскай імпэрыі, касьцёл працягваў дзейнічаць.

У 1904—1910 гадох вялося будаваньне новага мураванага касьцёла.

Найноўшы час

Па Другой сусьветнай вайне савецкія ўлады зачынілі касьцёл, будынак якога перарабілі пад сховішча збожжа. У 1988 годзе касьцёл вярнулі каталікам.

Архітэктура

Помнік архітэктуры нэараманскага стылю. Гэта 3-нэфавая 2-вежавая базыліка з 5-граннай апсыдай. 3-ярусныя чацьверыковыя вежы завяршаюцца высокімі шатрамі і кампазыцыйна аб’ядноўваюцца 2-схільным шчыпцом. Над высокім 2-схільным дахам над апсыдай стаіць мініятурная шатровая сыгнатурка. Дзьвярныя праёмы і скразныя прасьветы вежаў маюць аркавую форму. Сьцены пэрымэтрам умацоўваюцца роўнымі контрфорсамі. Калярыстычны эфэкт архітэктуры дасягаецца маляўнічым спалучэньнем паліхромнай бутавай муроўкі сьценаў і элемэнтаў дэкору, выкананых з высакаякаснай чырвонай цэглы (пілястры, аркатурныя фрызы)).

Унутраная прастора падзяляецца на тры нэфы трыма парамі калёнаў і перакрываецца крыжовым скляпеньнем на падпружных арках, размаляваных расьлінным арнамэнтам. Над уваходам месьцяцца хоры. У інтэр’еры тры разьбяныя алтары ў стылі нэаготыкі: галоўны — Сьвятога Апостала Юды Тадэвуша (гэта трыфорыюм, у цэнтры якога зьмяшчаецца фігура сьвятога ў атачэньне меншых фігураў Сьвятых Апосталаў Пятра і Паўла), левы бакавы — Сьвятой Ганны і правы — Маці Божай Чанстахоўскай. У крыпце пад будынкам спачыў ксёндз Фэлікс Пяткевіч (1920). Мастацкую каштоўнасьць мае абраз першай паловы XІX ст. «Тройца новазапаветная».

Касьцельны пляц атачаецца бутавай агароджай з 3-аркавай брамай.

Галерэя

Гістарычныя здымкі

• Старыя здымкі
• 
  каля 1900 г.
• 
  1912 г.
• 
  1915—1918 гг.
• 
  1915—1918 гг.

Сучасныя здымкі

• Сучасны стан
• 
  З боку апсыды
• 
  Фрагмэнт
• 
  Брама
• 
  Арган

Літаратура

• Кулагін А. Каталіцкія храмы Беларусі: Энцыкл. даведнік / А. Кулагін; фатограф А. Дыбоўскі. — 2-е выд. — Менск: БелЭн, 2008. — 488 с.: іл. ISBN 978-985-11-0395-5.

Вонкавыя спасылкі

• Касьцёл Сьвятых Сымона і Тадэвуша ў Лаздунах, Radzima.org