Neshta
Neshta — кампутарны вірус, які зьявіўся ў Рэспубліцы Беларусь у канцы 2005 году. Назва віруса ўтвараецца ад трансьлітарацыі беларускага слова «не́шта».[1] Neshta належыць да катэгорыі файлавых вірусаў — цяпер мала папулярнага віду шкодных праграмаў.
У базах антывірусных праграм Neshta вядомы, як Virus.Win32.Neshta.a («Антывірус Касьперскага»), Win32.HLLP.Neshta (Dr. Web), Win32.Neshta (ESET NOD32), Win32.Neshuta (Norton AntiVirus).
Фактычна, Neshta зьяўляецца першым беларускім вірусам, які атрымаў шырокае распаўсюджваньне (у асноўным, у самой Беларусі і краінах СНД). Пры тым, што вірус не ўтрымоўвае ў сабе разбуральнай функцыі, у першыя месяцы яго распаўсюджваньня вялікі лік кампутараў у Беларусі папакутаваў якраз ад яго лячэньня. Гэта было зьвязана з тым, што папулярныя антывірусы выдалялі сам вірус, але не вярталі некаторыя зьмененыя вірусам значэньні ў рэестры ў першапачатковы выгляд. У выніку, нармалёва працавалы да лячэньня кампутар пры спробе запусьціць любую праграму выдаваў стандартны дыялёг «Не атрымалася адкрыць наступны файл...».
Тэхнічныя падрабязнасьці[рэдагаваць | рэдагаваць крыніцу]
Пры запуску заражанай праграмы на «чыстай» машыне вірус капіюе сваё цела ў файл svchost.com (памер — 41 472 байты) у дырэкторыі Windows. Пасьля гэтага рэгіструе гэты файл у сыстэмным рэестры па адрасе HKCR\exefile\shell\open\command, у выніку чаго запуск любога exe-файла на заражанай машыне будзе папярэднічацца запускам файла віруса. Затым вірус скануе даступныя лягічныя дыскі кампутара і заражае exe файлы, якія задавальняюць некаторым крытэрам (як правіла, гэтая пераважная большасьць exe-файлаў). Пасьля заражэньня праца кампутара не парушаецца.
Для ўзнаўленьня працаздольнасьці кампутара пасьля выдаленьня Neshta антывірусам можа спатрэбіцца зьмяніць значэньне ключа ў рэестры па адрасе HKCR\exefile\shell\open\command з «%Windows%\svchost.com „%1“ %*» на «%1» %* — БЯЗ згадваньняў аб windows\svchost.com
Пасланьне аўтара[рэдагаваць | рэдагаваць крыніцу]
Вядомыя дзьве вэрсіі віруса — «а» і «b». Вэрсія «a» ўтрымоўвае ў сабе пасланьне аўтара наступнага зьместу:
«Delphi-the best. Fuck off all the rest. Neshta 1.0. Made in Belarus. Прывiтанне ўсiм ~цiкавым~ беларус_кiм дзяўчатам. Аляксандр Рыгоравiч, вам таксама. Восень — кепская пара… Алiварыя — лепшае пiва! Best regards 2 Tommy Salo. [Nov-2005] yours [Dziadulja Apanas]»
— Работа «Технобанка» была парализована устаревшим вирусом, БЕЛОРУССКИЕ НОВОСТИ[1]
У пасланьні аўтар перадае «найлепшыя пажаданьні» Томі Сала — брамніку зборнай Швэцыі па хакеі, у выніку памылкі якога ў чвэрцьфінальнай гульні на зімовай алімпіядзе 2002 году ў Солт Лэйк Сіці зборная Беларусі змагла выйсьці ў паўфінал.
Факты[рэдагаваць | рэдагаваць крыніцу]
- У 2007-м годзе шырокую агалоску атрымаў выпадак заражэньня вірусам Neshta ўсяго кампутарнага парку беларускага банку «Тэхнабанк», у выніку якога кліенты банку на працягу некалькіх сутак не маглі праводзіць грашовыя апэрацыі. Паведамленьне аб дадзеным інцыдэнце зьявілася ў тэлевізійных навінах беларускага канала «ОНТ».
- Праваахоўныя органы Беларусі ў 2006 годзе заявілі аб намеры знайсьці й прыцягнуць да адказнасьці аўтара шкоднаснага кода, аднак дагэтуль імя аўтара Neshta невядома.
- Акрамя краін СНД, вірус распаўсюдзіўся (значна меней) на тэрыторыі ЗША, Канады, Польшчы, Нямеччыны, Бразыліі і іншых краін.
- На працягу ўсяго часу з моманту выяўленьня старонка з апісаньнем віруса Neshta ў «Віруснай энцыкляпэдыі» ўваходзіць у дзясятку самых наведвальных.
Крыніцы[рэдагаваць | рэдагаваць крыніцу]
Вонкавыя спасылкі[рэдагаваць | рэдагаваць крыніцу]
- «Вірусная энцыкляпэдыя» — апісаньне віруса Neshta ў «Віруснай энцыкляпэдыі» (рас.)
- Neshta ў навінах (рас.)
- Як змагацца зь вірусам Neshta (рас.)